Dear Editor,
Wen mi read Miss Jenni harticle bout de Ginnalship, mi coulda ban mi belly an baal! But tap! Das egzakly wah Gad want! Yes! De evidence clear clear – wi cyaa save wiself. Ongle Gad one cyan save wi tideh day. Yu nuh, mi read de early paat a Revelation wid Jeezas letta to de church dem. Miss Jenni, wi tan same like dem! Mhm. Mi nuh seh sum a wi nah hole awn, but, talk de choot weh Gad luv, as de church an as a peepl, wi
- Nuh luv Pupa Jeezas like how wi use to luv im.
- Still a seh “wi Gad bless” an satisfy wid dat.
- Rap-up wid dem odda one an a mek dem entice wi.
- Put peepl pon podium who wi know a lead peeple astray.
- A di walkin ded.
- Wishi-washi. Wi nuh hat, wi nuh cowl.
A nuh one an two time Him tell de church dem fi repent or else!! Hmm, si de ginnalship deh. If wi cyaa hear wi gwine feel!
But seh dis an seh dat, bout di Prime Minista, him one coodn stan up gaince dah big werl powa wid dem intenshans. No. Wi haffi pray fi him. Wi sidung yah, at ease in Zion, an nuh si seh big worl powa a cum gayns wi! Wi haffi pray fi wi leeda. Wi haffi pray fi wi self. Wi haffi pray fi wi naybah dem. De hole a wi inna de same Caribbean Basin. It nuh tek nuttn fi dem odda cuntri weh gwaan like Gad fi out de hole a wi light same time. Wussa still, wi nuh know wah evil dem a do inna de daak!!
Pupa Jeezas who did si dis lang time tell wi wah fi do – Ripent. Lissn to im. Bayr de persicyooshan wah man going giv. Jah si and noh – Him waah leed wi out an pay wi back. A nuh jus inna Revelation him tell wi so. Fram Chronicles im seh dat if im peepl dem whose name afta im, jus umble wiself, talk wid Him, look im inna im yeye, lef offa de wikidness, Him a go hear wi, figiv wi and save wi fram de ginnal dem, plague, disaster an spiritual decay.
My peeps, mek wi ripent and pray.
Won luv,
F. Barrett
