Creole Fi Di Soul: Yuh Baddy Ah God Propatty

By Dwayne White

Cool nuh family. 

Wen God call wi, please fi know seh ah di whola wi Him call. 💯

But some a wi ungle decide fi gi Him pawt. 

One man tell mi seh him save from fi him head to fi him waist, an everyting else belong to sumaddy else. 

But, di devil is a teef❗

Like all him now, him tink seh when God come, a ungle fi him tap pawt a gah heaven? Kmt❗

Hey, nuh mek nuhbaddy fool yuh – wi cyah mack God enuh, anyting weh a man sow,  a dat him a go reap. (Galatians 6:7)

 Grace Thrillers seh inna one sang: “99  & a 1/2 nah go do. Surrendarin hall a weh mi need fi do.”

How yuh fi tek God baddy an ah dweet suh❓

Yuh draw one dove pan yuh han seh ah tattoo, an 10 years later it tun inna one fowl, dat mek sense❓

God gi yuh 2 nose hole, an yuh gah put 1 more in a di tap, fi wah❓

Hey, wen God seh wi mus holy, ah neva suh Him mean❗

1 Cor. 6:19 seh, “Yuh neva know seh yuh baddy ah di Holy Ghost propatty?”

Dat mean seh, wi cyah do any an any ting wid God baddy an tink seh it right. 

Ef God did wah fi live inna one 10-bedroom hup ah Cherry Gawden,  wi cuddn tap Him; but ah inna mi an yuh Him choose fi live, suh wi haffi careful weh wi deh do wid Him propatty. 

Di heart ah di best ting wi cudda gi God – but ef di baddy nuh deh deh to – wi nuh fully surrendah,

An ah lie wi ah live. 

______________________

Dwayne White is Youth Pastor at the Jamaica Evangelistic Centre. Contact nat_gifted06@yahoo.com